Bay -team aavaj marathi
Dr. शिवचरण हिंगमिरे पत्रकार उमरखेड (यवतमाळ)
उमरखेड तालुक्यातील चातारी गावचे सुपुत्र व सध्या घाटकोपर (मुंबई) येथे सहाय्यक पोलिस आयुक्त पदी असलेले श्री शैलेश पसलवाड यांना महामहीम राज्यपालांच्या हस्ते राष्ट्रपती पदकाने गौरवांकित करण्यात आले. पसलवाड यांनी पोलिस दलात आपल्या कर्तव्यापरी असलेली निष्ठा आणि बजावलेली भूमिकेमुळे त्यांना राष्ट्रपती पारितोषिक पदकं देण्यात आल्याने त्यांच्या चातारी गावासह उमरखेड तालुक्यात नागरिकांनी जल्लोष साजरा केला.
याबाबत सविस्तर वृत्त असे की, मुंबई घाटकोपर विभागाचे सहाय्यक पोलिस आयुक्त शैलेश पसलवाड यांचा राज्याचे राज्यपाल सी.पी. राधाकृष्णन यांच्या हस्ते पोलीस दलात अतिशय उत्कृष्ट कार्य केल्याबद्दल राष्ट्रपती पदक देऊन त्यांना गौरवांकित करण्यात आले. चातारीच्या सुपुत्राने उमरखेड तालुक्याच्या शिरपेचात मानाचा तुरा रोवल्यामुळे ते प्रशंसेस पात्र ठरत आहेत.
सहा.आयुक्त श्री.पसलवाड यांचा पोलीस दलातील उत्कृष्ट कार्य केल्याबद्दल पोलीस संचालक श्रीमती रश्मी शुक्ला यांच्या हस्ते दि.२८ जुलै रोजी सायंकाळी चार वाजता सत्कार करण्यात आला यानंतर दि.२९ जुलै रोजी महाराष्ट्राचे राज्यपाल महामहीम सी पी राधाकृष्णन यांच्या हस्ते त्यांचा पोलीस दलातील उत्तम कामगिरी केल्याबद्दल व निस्वार्थीपणे प्रामाणिक सेवा केल्याबद्दल उत्कृष्ट सेवेचे राष्ट्रपती पदक देऊन संपूर्ण कुटुंबाचा गौरव करण्यात आला.शैलेश पसलवाड यांची पदार्थ विज्ञान शाखेमध्ये पदवित्तर शिक्षण घेत असताना महाराष्ट्र लोकसेवा आयोग मार्फत पोलीस उपनिरीक्षक पदाची परीक्षा १९९० मधे पास करून मुंबई येथे कायदा व सुव्यवस्थेसाठी अतिशय संवेदनशील असलेल्या देवनार पोलीस स्टेशन शिवाजी नगर येथे प्रथम नियुक्ती झाली.
त्यांनी १९९२ च्या जातीय दंगलीत दोन पोलीस अंमलदारांच्या खुनाबाबत अतिशय वेगाने तपास केला होता. तसेच मुंबई पोलीस दलाच्या गुन्हे शाखा, गुन्हे अन्वेषण विभाग या अति विशेष पोलीस दलात दीर्घकालीन काम करून संवेदनशील गुन्हे उघडकिस आणले. नियुक्ती पासून ते आज पर्यंत त्यांनी मुंबई विभागातील अनेक पोलीस ठाण्यात आपली सेवा बजावली आहे. त्यांना केंद्र सरकारचा सर्वोच्च सन्मान, महाराष्ट्र पोलीस संचालक तसेच मुंबई आयुक्त यांच्याकडून यापूर्वीच विविध सन्मान मिळालेले आहेत. गुन्हा अन्वेषण शाखेतून त्यांनी मुंबईतील विविध ठिकाणी झालेल्या बॉम्बस्फोट तपास प्रकरणात ड्रग्स माफिया, विविध मोठे संवेदनशील खून प्रकरणातील गुन्हे उघडकीस आणण्यात मोठी कामगिरी केलेली आहे.
मुंबई मध्ये गुन्हेगारी टोळीने केलेल्या एका प्रसिद्ध दैनिकाच्या पत्रकारचा खुनाचा गुन्हा उघडकीस आणला त्यावेळी तत्कालीन गृहमंत्री आर. आर. पाटील यांनी रोख पुरस्कार देऊन गौरव केला होता. तसेच तत्कालीन पोलीस आयुक्त बृहन्मुंबई यांनी दिपक जोग ट्रॉफी देऊन सन्मानित केले होते.त्यामुळे गुन्हेगारी वर्तुळात त्यांच्याबद्दल एक जबरदस्त धाक आहे.
यावेळी मनोगत व्यक्त करताना तसेच त्यांच्या आई श्रीमती पद्मिनाबाई पसलवाड (वय ७९ ) यांनी शैलेश सह तीन मुले व तीन मुली यांना मोठ्या कष्टातून वाढवलं आहे. त्यामुळे या कामाचं संपूर्ण श्रेय आयुक्त पसलवाड हे आपल्या आईला दिले. पसलवाड यांना सर्वोच्च राष्ट्रपती पदकाने सन्मानित केल्याबद्दल चातारी परिसरासह उमरखेड तालुक्यातील त्यांच्या या यशाबद्दल त्यांचे सर्वत्र कौतुक होत आहे.
सहाय्यक पोलीस आयुक्त शैलेश पसलवाड यांचा अल्प परिचय
सेवानिवृत्त मुख्याध्यापक कै.दिगंबर राव किसन पसलवाड यांचे ते चिरंजीव आहेत. यांचे प्राथमिक शिक्षण यवतमाळ जिल्ह्यातील उमरखेड तालुक्यातील मु.पो.चातारी येथील जिल्हा परिषदेच्या शाळेत चातारी येथे झाले, माध्यमिक शिक्षण गावात दहावी पर्यंत झाले. त्यानंतर त्यांनी नांदेड येथील विज्ञान शाखेत नंतर यशवंत महाविद्यालय येथुन पदार्थ विज्ञान विषयात पदवी आणि पुढे संभाजीनगर येथे उच्च शिक्षण पूर्ण केले.
0 Comments