उत्तर प्रदेशच्या बरेली मध्ये लग्न मंडपात नवरी पळून गेल्याने गोंधळ झाला, त्यानंतर धाकट्या बहिणीच्या लग्नावरून झालेल्या वादात हिंसाचार होऊन लग्न रद्द झाले. एका लग्न समारंभात अत्यंत नाट्यमय आणि हिंसक घटना घडली, ज्यामुळे आनंदाचे वातावरण काही क्षणातच हाणामारीत रूपांतरित झाले. बिथरी चैनपूर भागातील एका गावातून ही घटना समोर आली असून, लग्नाच्या दिवशीच नवरी मुलगी आपल्या प्रियकरासोबत पळून गेल्याने मोठी खळबळ उडाली होती. कुटुंबाची प्रतिष्ठा वाचवण्यासाठी दोन्ही बाजूंनी चर्चेनंतर नवरीच्या धाकट्या बहिणीशी लग्न करून देण्याचा निर्णय घेतला. मात्र, ही चर्चा सुरू असतानाच लग्नाच्या मांडवात उपस्थित असलेल्या वऱ्हाडी मंडळींच्या कानावर धाकट्या बहिणीच्या ही प्रेमप्रकरणाची माहिती पडली आणि परिस्थिती चिघळली.
या घटनेची सुरुवात शुक्रवारी रात्री झाली, जेव्हा नियोजित नवरी मुलगी घरातील दागिने घेऊन आपल्या प्रियकरासोबत पळून गेली. नवरी पळून गेल्याने दोन्ही कुटुंबात मोठा गोंधळ उडाला आणि लग्नाचे नाते तुटण्याच्या मार्गावर आले. शेवटी गावकरी आणि नातेवाईकांनी पुढाकार घेऊन एक पंचायत बोलावली. अनेक तासांच्या वादानंतर कुटुंबाची इज्जत वाचवण्यासाठी वधूच्या धाकट्या बहिणीशी नवरदेवाचे लग्न लावून देण्याचे ठरले. वऱ्हाडी मंडळी लग्नासाठी पोहोचली होती, परंतु नशिबाला काही वेगळेच मंजूर होते.
लग्नाची तयारी सुरू असतानाच, धाकट्या बहिणीच्या प्रेम प्रकरणाची बातमी कोठून तरी वराच्या नातेवाईकांपर्यंत पोहोचली. ज्या मुलीशी लग्न ठरवण्यात आले होते, तीही स्वतःच्या मर्जीने हे लग्न करण्यास तयार नसल्याची माहिती मिळाल्यामुळे वराच्या बाजूचे लोक भडकले. यावरून दोन्ही कुटुंबांतील वादाचे रूपांतर हाणामारीत झाले. लाठ्या-काठ्या आणि विटांचा वापर करून तुफान हाणामारी झाली, ज्यामध्ये तीन लोक गंभीर जखमी झाले असून त्यांना तातडीने रुग्णालयात दाखल करण्यात आले आहे.
या हिंसक घटनेमुळे लग्न समारंभ पूर्णपणे रद्द झाला आणि वरात कोणतीही वधू न घेताच परतली. घटनेची माहिती मिळताच बिथरी चैनपूर पोलीस तातडीने घटनास्थळी पोहोचले आणि त्यांनी परिस्थिती नियंत्रणात आणली. पोलिसांनी या प्रकरणातील चार जणांना ताब्यात घेतले असून, अधिक तपास सुरू आहे. एकापाठोपाठ दोन मुलींच्या प्रेम प्रकरणांमुळे आणि त्यामुळे झालेल्या मारहाणीमुळे या घटनेची चर्चा संपूर्ण परिसरात सुरू आहे. कौटुंबिक प्रतिष्ठेच्या प्रयत्नांना हिंसक वळण लागल्याने प्रशासनानेही या प्रकरणाची गंभीर दखल घेतली आहे. उत्तर प्रदेशच्या बरेली मध्येही घटना घडली.
0 Comments