नांदगाव तालुक्यात यंदाच्या खरीप हंगामात नगदी पीक म्हणून मकाच्या पिकास प्रथम प्राधान्य देण्यात आले असून, मागील काही वर्ष पांढरं सोनं म्हणून ओळखल्या जाणाऱ्या कपाशीचे उत्पादन काढण्यात अव्वल क्रमांकावर असलेल्या या तालुक्याने कपाशी पिकावर येणारे विविध आजार त्याचप्रमाणे मोठ्या प्रमाणात येणारा खर्च आणि विशेषता वेळेवर मजूर उपलब्ध होत नसल्याने मकाच्या लागवडीस प्राधान्य देऊन, कपाशी लागवडीकडे पाठ फिरवली असल्याचे शेतकरी वर्गाकडून सांगण्यात येते.
सविस्तर वृत्त असे की,नांदगाव तालुक्यातील जातेगाव, नांदगाव, न्यायडोंगरी, बाणगाव बु, भार्डी, मनमाड वेहेळगाव व हिसवळ या आठ महसूल मंडळातील ११०६५१ हेक्टर ४५ आर भौगोलिक शेत जमीनीच्या क्षेत्रापैकी शेती करण्यासाठी उपयुक्त असलेल्या ६३९९४ हेक्टर ६६ आर क्षेत्रापैकी ६२१०० हेक्टर २० आर शेतजमीनीवर शेतकरी बांधवांनी खरीप हंगामातील ज्वारी ५५ हे. बाजरी ७४९८ हे.५० आर, मका ४२२३८ हे., इतर तृणधान्ये ४९८५१ हे., तुर ३७१.हे ९० आर, मुग २४३९ हे. उडीद ३० हे ५० आर, कुळीथ १८ हे., भुईमूग १६९६ हे., सोयाबीन ५७३हे ५० आर, इतर गळीत धान्य २२७१ हे.५० आर आणि कपाशी ७१४८ हे. ८० आर शेतजमीनीवर वरील प्रमाणे पिकांची लागवड व पेरणी करण्यात आली असल्याचे नांदगाव तालुका कृषी अधिकारी रवींद्र डमाळे यांनी दि. २५ ऑगस्ट रोजी जिल्हा कृषी अधिक्षक नाशिक, उपविभागीय कृषी अधिकारी मालेगाव, उपविभागीय अधिकारी येवला आणि तहसील नांदगाव यांना पाठविलेल्या अहवालात म्हटले आहे.
तालुका कृषी अधिकारी डमाळे यांनी दिलेल्या वरील अहवालानुसार तालुक्यात मका या पिकाची मोठ्या प्रमाणात लागवड करण्यात आली असल्याचे दिसून येते. तर नांदगाव तालुक्याची कुसुमतेल, ढेकू खुर्द बुद्रुक, जातेगाव, वसंत नगर एक दोन, चंदनपुरी, लोढरे, बोलठाण, गोंडेगाव, जवळकी आणि रोहिले या घाट- माथ्यावरील १२ गावांमध्ये एकेकाळी १००% पांढरे सोने कपाशीच्या उत्पादनासाठी ओळख ठरलेल्या व नगदी पीक म्हणून ओळखल्या जाणाऱ्या कपाशीच्या कमालीची घट झाली असल्याचे दिसून येते.
या बाबत लोढरे येथील प्रगतिशील शेतकरी व तालुका कृषी उत्पन्न बाजार समितीचे माजी सभापती दत्तात्रय पा. निकम व जातेगाव येथील प्रगतिशील शेतकरी दत्तात्रय भट व प्रभाकर शिंदे, योगेश सोनवणे यांनी दिलेल्या माहितीनुसार कपाशी या पिकाचे महागडे बियाणे तसेच ते लागवड करण्यापासून ते कपाशीच्या तीनवेळा वेचणी करण्यापर्यंत शेतकरी बांधवांना मोठ्या प्रमाणात येणारा खर्च, त्याचप्रमाणे कपाशी पिकावर येणाऱ्या आजारांवर विविध कीटकनाशकांच्या फवारण्या करण्यासाठी होणारा खर्च तसेच निसर्गाच्या लहरीपणामुळे अ वेळी होणारा अवकाळी पाऊस.
त्यामुळे कपाशीच्या पिकावर येणारा लाल्या रोग आणि सर्वात महत्वाचे म्हणजे कापूस वेचणी करण्यासाठी होणारा मोठ्या प्रमाणात खर्च व सर्वात महत्वाचे म्हणजे कापूस वेचणी करण्यासाठी वेळेवर उपलब्ध न होणारे मजूर या सर्वांचा सारासार विचार करून कपाशी या पिकाची लागवड करण्याकडे पाठ फिरवली असून, दरवर्षी शेतकरी बांधवांनी आपल्या- कडे असलेल्या वहिती शेत जमीनीवर मका व इतर धन्य कडधान्य लागवड करण्यास प्राधान्य दिले असल्याचे सांगितले.तसेच दुसरे कारण म्हणजे मकाचे पिक निघाल्यानंतर ताबडतोब कांदा, गहू, हरभरा, ज्वारी इत्यादी दुसऱ्या पिकांच्या लागवड व पेरणी करण्यासाठी कमी कालावधीत शेतजमीन उपयोगात हे एक मुख्य कारण असल्याचे त्यांनी सांगितले.
0 Comments