दि.२०.... रविवार दि १७ रोजी जातेगाव येथे डोंगरावर देवदर्शन करून परतत असताना झालेल्या ट्रॅक्टरच्या अपघातातील गंभीर जखमी असेलेल्या भक्ती अप्पासाहेब राऊत हिचे छत्रपती संभाजी नगर येथे इस्पितळात उपचार सुरू असताना आज सकाळी साडेदहा वाजेच्या सुमारास निधन झाले.
सविस्तर वृत्त असे की, जातेगाव पासून सात किलोमीटर अंतरावरील डोंगरावर पिनाकेश्वर महादेवाचे दर्शनासाठी आलेल्या छत्रपती संभाजी नगर जिल्ह्यातील कन्नड तालुक्यातील खामगाव येथील भाविकांचे ट्रॅक्टर देवदर्शन करून घाट उतरत असताना रविवार दि १७ रोजी ५ वाजेच्या सुमारास अगदी शेवटच्या टप्प्यावर ट्रालीसह ट्रॅक्टर सुमारे दोनशे फूट खोल दरीत गेल्याने ट्रालीमध्ये बसलेल्या पैकी कांताबाई नारायण गायके (वय ५६), कमलबाई जगदाळे (वय ६२) या दोन महिलांना डोक्याला व इतर ठिकाणी मार लागल्याने त्यांची प्रकृती गंभीर असल्याने इस्पितळात उपचार करण्यापूर्वी त्यांचे निधन झाले होते. यावेळी देवदर्शनासाठी जाणाऱ्या येणाऱ्या भाविकांना वेळेत तत्परता दाखवत सर्व जखमींना बाहेर काढून तात्काळ बोलठाण येथील रुग्णालयात दाखल केले होते.
तर तिसरी गंभीर जखमी असलेली भक्ती अप्पासाहेब राऊत (वय १४) हिचेवर खाजगी रुग्णालयात उपचार सुरू असताना आज बुधवार दि.२० रोजी सकाळी १०.३० वाजता तीने अखेरचा श्वास घेतला. कु.भक्ती च्या निधनाची बातमी समजताच जातेगाव तसेच खामगाव आणि पंचक्रोशीत शोककळा पसरली. तीचे वर खामगाव येथील अमरधाम मध्ये दुपारी दिड वाजता शोकाकुल वातावरणात अंत्यसंस्कार करण्यात आले.
या अपघातातील ट्रॅक्टरच्या ट्रॉली मध्ये अन्य १२ जणांवर उपचार सुरू असून त्यांची प्रकृती स्थिर असल्याचे सांगण्यात आले. या झालेल्या अपघातापूर्वी चार दिवस अगोदर दिनांक १४ रोजी एका ट्रॅक्टरच्या ट्रॉली पलटी होऊन झालेल्या अपघातात येवला तालुक्यातील उंदीरवाडी येथील देविदास दौलतराव सोनवणे (वय ५५) यांचे निधन झाले होते, तर अन्य चार जन जखमी झाले होते.
0 Comments