उमरखेड तालुक्यातील विडुळ येथील श्री उमा महेश्वर संस्थान येथून श्री क्षेत्र कपिलाधार जिल्हा बीड येथे कार्तिक पौर्णिमेनिमित्त निघालेल्या श्री उमा महेश्वर मन्मथ स्वामी ज्योत यात्रेचे उमरखेड येथे भव्य स्वागत करण्यात आले. वीरशैव संत परंपरेतील सोळाव्या शतकातील संत श्री मन्मथ स्वामी यांच्या संजीवन समाधी स्थळी श्री क्षेत्र कपिलधार जिल्हा बीड येथे कार्तिक पौर्णिमे- निमित्त साजऱ्या होणाऱ्या सोहळ्यासाठी महाराष्ट्र, कर्नाटक, आंध्र,आदि राज्यातून अनेक शिवाचार्यांच्या नेतृत्वात निघणाऱ्या दिंडीच्या माध्यमातून लाखो भाविक सहभागी होतात.
यावेळी सलग नवव्या वर्षी विडूळ येथून ज्योत यात्रा निघाली असून उमरखेड येथे आगमन होताच साईश्रध्दा नगर येथील नर्मदेश्वर महादेव मंदिरावर ज्योत यात्रेचे स्वागत करण्यात आले. यावेळी आमदार किसनराव वानखेडे, नितीन भाऊ भुतडा, प्रकाश अप्पा दुधेवार, बबन अप्पा पुरमे, प्रभाकर दिघेवार, गजानन रासकर,संतोष हिंगमिरे,अशोक आप्पा पुरमे, बबन अप्पा भोकरे
प्राध्यापक संतोष बिचेवार, किसन अप्पा हिंगमीरे,सागर बारे, किसन अप्पा बिचेवार,डांगे, बालाजी शिरडकर, डॉ. शिवनकर ,सावन महाराज बेंडके ,डॉ. मुळावकर ,ओमकार पुजारी ,सौरभ बिचेवार, सुनील बिचेवार, दिलीप बिचेवार, किसन हिंगमिरे, व्यंकटेश्वर भजनी मंडळ, यांच्यासह अनेक कार्यकर्ते व महिला उपस्थित होत्या. धनंजय बट्टेवार या दाम्पत्याच्या हस्ते ज्योत यात्रेचे स्वागत करून महाआरती करण्यात आली. यावेळी धनंजय बट्टेवार यांच्यातर्फे उपस्थितांना प्रसादाचे वाटप करण्यात आले.
ज्योत याञेतील भक्तांसाठी श्री सागर बारे यांनी प्रसादाची व्यवस्था केली होती.तीन दिवसांच्या पायी प्रवासानंतर मन्मथस्वामी साक्षात्कार दिनी म्हणजे कार्तिक पौर्णिमेला ज्योत याञा कपिलाधार क्षेञी पोहचणार आहे,तिथे संपुर्ण याञेकरूंचे नियंञण व स्वच्छता अभियान विडूळ येथील भक्त राबविणार आहेत.
0 Comments