नांदगाव तालुक्यातील न्यायडोंगरी येथील अत्यल्प भूधारक शेतकरी दिगंबर उत्तम कोऱ्हाळे यांनी बंदिस्त गोठ्यात मोकळ्या ठेवलेल्या ५ गाभण बकऱ्या,१ मेंढी वन्यप्राणी लांडग्याने ठार तर १ वर्षांचे गायीचे वासरू जखमी केल्याची घटना आज संध्याकाळी ५ वाजेच्या सुमारास घडली.
याबाबत सविस्तर वृत्त असे की,न्यायडोंगरी येथील दिगंबर कोऱ्हाळे यांची आर्थिक स्थिती अत्यंत बेताची आहे. कुटुंबात केवळ अडीच एकर शेती असून, तीसुद्धा त्यांच्या वडिलांच्या नावावर आहे. अशा स्थितीत घर उदरनिर्वाह करण्यासाठी यांनी विजय नंदलाल पाटणी यांची शेती वार्षिक ठोक्यावर कसण्यासाठी घेतलेली आहे त्याचबरोबर मोलमजुरी सह शेळीपालनाचा पर्याय निवडला. मोठ्या मेहनतीने व कष्टाने त्यांनी दहा बकऱ्या वाढविल्या. यासाठी गावापासून साधारण २ किमी अंतरावर गट नंबर ५१८/२ मधील हातगाव बंधारा रस्त्यावर त्यांनी गोठा बांधला आहे.
त्यामध्ये या सर्व बकऱ्या त्यांनी मोकळ्या अवस्थेत ठेवल्या होत्या. दरम्यान, संध्याकाळच्या सुमारास या गोठ्यावर वन्यप्राणी लांडग्याने हल्ला चढवून दहा पैकी ५ गाभण बकऱ्या , १ मेंढी ठार केल्याने दिगंबर कोऱ्हाळे यांच्यावर मोठे संकट ओढावले असून त्यांच्या उदरनिर्वाहावर देखील गदा आली आहे. सायंकाळी ५ वाजेच्या सुमारास बकऱ्यांना चारापाणी देण्यासाठी गेले असता ही बाब उघडकीस आली.
याबाबतची माहिती मिळाल्यानंतर वनविभागाचे वनपरिक्षेत्र अधिकारी एस.बी.कोकाटे यांच्या मार्गदर्शनाखाली वनरक्षक समाधान सोनवणे, वनपाल एम एम राठोड हे संबंधित कर्मचारी घटनास्थळी तत्काळ दाखल होऊन पंचनामा केला. तर पशुवैद्यकीय अधिकारी डॉ. प्रणव जाधव यांनी मृत बकऱ्यांच्या शवविच्छेदनाची प्रक्रिया पूर्ण केली आहे. झालेल्या पशुधनाची नुकसान भरपाई देण्याची मागणी कोऱ्हाळे कुटुंबीय करीत आहे. -----------
0 Comments