नांदगाव येथील कला, वाणिज्य व विज्ञान महाविद्यालयात १४ सप्टेंबर हा दिवस 'हिंदी दिन' मोठ्या उत्साहात साजरा करण्यात आला. यावेळी प्रमुख वक्ते प्रा. आर. पी. सुरसे यांनी हिंदी भाषेचे कुळ शब्द भांडार, तिची वैशिष्ट्ये व जागतिक महत्त्व स्पष्ट करताना हिंदी भारताची राष्ट्रभाषा असून तिच्या १८ उपभाषा १४४ बोली असल्याचे सांगितले. हिंदी ही जगातील सर्वाधिक लोकांना समजणारी व बोलली जाणारी भाषा असून मातृभाषेबरोबर इतर भाषेलाही सन्मान देणे आवश्यक असल्याचे त्यांनी नमूद केले.
कार्यक्रमाचे अध्यक्ष प्राचार्य डॉ. आर. एन. भवरे यांनी विद्यार्थ्यांना मार्गदर्शन करताना हिंदी ही भारतीय संस्कृतीचा आत्मा असून तिचा वापर साहित्य, संशोधन व तंत्रज्ञान क्षेत्रात वाढवावा असे आवाहन केले.विद्यार्थ्यांना हिंदी भाषेच्या साहित्यिक संपन्नतेचा लाभ घ्यावा, तसेच संशोधन,विज्ञान,तंत्रज्ञान आणि प्रशासकीय कामामध्ये ही तिचा वापर वाढवावा असे आवाहन केले. “हिंदी ही केवळ संवादाची भाषा नसून विचारांची, भावनांची आणि संस्कृतीची अभिव्यक्ती आहे. तिच्या जतनासाठी आणि प्रसारासाठी प्रत्येकाने जागरूक राहिले पाहिजे”असे त्यांनी विशेषत्वाने नमूद केले.
कनिष्ठ महाविद्यालयाचे हिंदी प्राध्यापक श्री. गोकुळ बोरसे यांनीही भाषणात विद्यार्थ्यांनी हिंदीच्या प्रचार-प्रसारासाठी तंत्रज्ञान व सामाजिक माध्यमांचा वापर करावा, भाषेच्या जतन-संवर्धनात सर्वांचा सहभाग आवश्यक असल्याचे प्रतिपादन केले.
यावेळी काही विद्यार्थ्यांनीही आपली मनोगते व्यक्त केली. त्यांनी हिंदी ही राष्ट्रभाषा म्हणून आपल्याला एकत्र बांधणारी शक्ती असल्याचे सांगत तिच्या अभिमानाचे आणि संवर्धनाचे आवाहन केले. कार्यक्रमाला महाविद्यालयातील प्राध्यापक,विद्यार्थी व कर्मचारी मोठ्या संख्येने उपस्थित होते. या कार्यक्रमाचे सूत्रसंचालन प्रा.ए.एफ.राठोड यांनी केले तर प्रास्ताविक व आभार प्रदर्शन हिंदी विभाग प्रमुख डॉ. बी. बी. धोंगडे यांनी केले.
0 Comments