जातेगाव येथील दीड शतका पूर्वीचे दुर्गादेवी मंदिर

 Bay- team aavaj marathi 

नांदगाव तालुक्यातील जातेगाव येथे गावाच्या लगत शेतात पुरातन दुर्गादेवीचे मंदिर आहे. ह्या देवस्थान बाबत शेत जमीनीच्या पहिल्या मालकाचे वंशज प्रमोद गोंधळे यांनी दिलेल्या माहितीनुसार साधारण दिडशे वर्षापूर्वी त्यांचे आजोबा दादाजी गोंधळे हे शेताची मशागत करत असताना त्यांना एका अखंड दगडावर दोन फूट उंचीची दुर्गादेवीची मूर्ती सापडली होती. 

त्यांनी याबाबत गावातील चावडीवर येवून माहिती दिली. व गावकऱ्यांनी दिलेल्या सल्ल्यानुसार परिवारातील सदस्यांच्या मदतीने देवीचे छोटेखानी मंदिराचे बांधकाम करुन मुर्तीची प्राणप्रतिष्ठा केली. सन १९५० च्या दशकात संत तुकडोजी महाराज आणि त्यानंतर संत गाडगेबाबा हे जातेगाव येथे आले त्यावेळी त्यांच्या सत्संगाचा मोठा कार्यक्रम मंदिराच्या समोर झाला होता. असे येथील वयोवृद्ध नागरिक सांगतात.

कालांतराने दादाजी यांच्या मुलगा शिवलींग गोंधळे यांनी सदरची शेतजमीन येथील कै.काशिनाथ काका पाटील यांना विकले कालांतराने जुने मंदिर जिर्न झाल्याने साधारण १५ वर्षांपूर्वी देवीची मूर्ती ज्या ठिकाणी सापडली होती त्याच ठिकाणी नवीन मंदिराचे व सभामंडपाचे बांधकाम करुन समोर २१ फूट उंच दिपमाळ बांधण्यात आली. त्यांचा परिवार उदरनिर्वाहासाठी नाशिक मालेगाव मुलुंड इत्यादी ठिकाणी गेल्यानंतर त्यांचेच भाऊबंद सदाशिव गोंधळे यांच्या परिवारातील सदस्य नाना गोंधळे हे या मंदिरात पुजा आराधना करतात, त्यांनी दिलेल्या माहितीनुसार गावातील महिला येथे घटस्थापना करतात.

ह्या देवीची मनोभावे पूजा करुन देवीसमोर काही मनोकामना व्यक्त केल्यास पुर्ण होते, असे सांगितले. पंचक्रोशीत दुसरे देवीचे मंदिर नसल्याने या परिसरातील नागरिक चैत्र पोर्णिमेला श्रावण महिन्यात तसेच नवरात्र उत्सवाच्या निमित्ताने भाविक मोठ्या संख्येने दर्शनासाठी येतात. याप्रसंगी मंदिरावर मोठ्या प्रमाणात विद्युत रोषणाई करण्यात येते.