नांदगाव तालुक्यातील ८ महसूल मंडळातील शेती पिकांचे अतोनात नुकसान झाले असून, तालुक्यातील ३ महसूल मंडळात पंचनाम्याचे आदेश देण्यात आले आहेत. तर नांदगाव, मनमाड,बाणगाव, हिसवळ, भार्डी ह्या पाच महसूल मंडळाबाबत प्रशासकीय पातळीवर अद्याप कुठलाही निर्णय न घेतल्याने ह्या पाचही मंडळातील शेतकरी अद्याप शेतीपिकांचे झालेल्या नुकसानीच्या पंचनाम्याच्या प्रतीक्षेत असल्याचे मे जिल्हा अधिकारी यांना दिलेल्या निवेदनात राष्ट्रवादी काँग्रेस शरदचंद्र पवार गटाचे नांदगाव तालुकाध्यक्ष महेंद्र बोरसे यांनी म्हटले आहे.
त्यांनी दिलेल्या निवेदनात पुढे म्हणाले की, प्रशासन मात्र स्वयंचलित स्कायमेट पर्जन्य मापक यंत्रणेच्या पाऊस नोंदींचा हवाला देऊन हतबलता व्यक्त करत आहे. कर्मचाऱ्यांची अपुरी संख्या, नियोजनाचा अभाव ह्यामुळे तीन मंडळातील आपत्ती व्यवस्थापनात प्रशासनाची दमछाक होत असल्याचे चित्र दिसून येत असल्याचे त्यांनी म्हटले आहे. गंभीर प्रतिकूल परिस्थितीत ८ ही मंडळातील आपत्ती निवारण करण्याची वेळ दुर्दैवाने आली तर यंत्रणा कोलमडून पडल्या शिवाय राहणार नाही. अतिवृष्टीचा संभाव्य धोका बघता तालुका प्रशासनाने सज्ज असावे अशी मागणी मा. जिल्हाधिकारी नाशिक यांना दिलेल्या निवेदनात राष्ट्रवादी काँग्रेस पक्ष शरदचंद्र पवार नांदगाव तालुकाध्यक्ष महेंद्र बोरसे यांनी केली आहे.
तालुका प्रशासनाने संयुक्त समिती मार्फत २३ सप्टेंबर रोजी वेहेळगाव, न्यायडोंगरी, जातेगाव महसूल मंडळात पंचनाम्याचे आदेश पारीत केल्यावरही अद्याप पावेतो कर्मचारी संख्येअभावी अनेक ठिकाणी संथगतीने तर काही गावात अजून पंचनामे करण्यास सुरुवातच झाली नाही. तर काही गावात कर्मचारी उडवा उडवीचे उत्तरे देत टाळाटाळ करत आहेत. अशा तक्रारी शेतकरी करत आहेत. तालुक्यातील आठही मंडळात अतिवृष्टीने शेती पिकांचे नुकसान झाले असून प्रशासनाने फक्त तीन मंडळात पंचनाम्याचे आदेश दिले आहेत. राहिलेल्या पाच मंडळांना डावलण्यामागे काय निकष लावले आहेत त्याचा खुलासा तालुका प्रशासनाने करावा.
तसेच स्वयंचलित स्कायमेट पर्जन्यमापक यंत्रणेच्या पर्जन्य नोंदी प्रमाणे तीन महसूल मंडळातील फक्त नुकसानीचे पंचनामे करण्याची भूमिका प्रशासन घेत असेल तर पर्जन्यमापक यंत्रणेच्या अचूकतेवर विश्वास ठेवून ५ मंडळातील नुकसान ग्रस्तांना डावलण्यामागे काय निकष लावले आहेत. त्याचा विचार करून उर्वरित पाचही मंडळातील नुकसानीचे पंचनामे करावे. गाव पातळीवरील नेमलेल्या प्रशासकिय यंत्रणांनी विनाकारण अडवणूक न करता झालेल्या नुकसानीचे सरसकट पंचनामे करून शेतकऱ्यांना मदत करावी. अशी मागणी महेंद्र बोरसे यांनी जिल्हा अधिकारी यांना दिलेल्या निवेदनात केली आहे.
0 Comments