जगन पाटील जेष्ठ पत्रकार न्यायडोंगरी नांदगाव (नाशिक)
नांदगाव तालुका कृषी उत्पन्न बाजार समितीची वार्षीक सभा प्रश्न उत्तराने चांगलीच गाजली, शेतकऱ्यांनी उपस्थित केलेले प्रश्न व समस्यांबाबत कृषी उत्पन्न बाजार समितीचे प्रशासन व संचालक मंडळ निरुत्तर झालेले दिसले. कृषी उत्पन्न बाजार समितीचे विद्यमान सभापती दर्शन अनिलकुमार आहेर यांच्या अध्यक्षतेखाली पार पडली. या सभेत अनेक प्रश्नांचा भडीमार करण्यात आला त्यात प्रामुख्याने मागील वर्षी पारित करण्यात आलेला ठराव तो म्हणजे शेतकऱ्यांच्या पाल्यांनी शैक्षणिक क्षेत्रात गुणवत्ता पूर्ण मार्क्स मिळविले असल्यास अशा शेतकरी पुत्रांचा सत्कार व पुढील शिक्षणासाठी प्रोत्साहन मिळावे या साठी एखादा स्तुत्य असा उपक्रम राबविण्याचा ठराव करण्यात आलेला होता.
त्या बाबत काय अंमलबजावणी करण्यात आली असे विचारण्यात आले असता यावर सर्वच निरुत्तर झाले. तसेच न्यायडोंगरी येथील बाजार समितीचे आवारात बांधण्यात आलेल्या विद्युत वितरण कंपनीच्या उपकेंद्राच्या भाडे करारा बाबत कोणतेही उत्तर प्रशासन देऊ शकले नाही त्याचबरोबर नुकतीच सुमारे आठ लाख खर्च करून न्यायडोंगरी आवारासाठी बांधण्यात आलेली संरक्षक भिंत अत्यंत निकृष्ट दर्जाची असून आजच काही ठिकाणी तुटल्याचे निदर्शनास आणून देण्यात आले तसेच नांदगाव मार्केट आवारात शेतकऱ्यांसाठी स्वच्छतागृह नसल्याची बाब चांदोरा येथील निलेश चव्हाण यांनी निदर्शनास आणून दिली असता सदरची मागणी तीन महिन्याच्या आत पूर्ण करण्यात येईल असे आश्वासन संचालक मंडळाने दिले.
तर महाराष्ट्रात झालेल्या पूरग्रस्तांसाठी मदत पाठविण्याचा प्रश्न पोखरीचे सरपंच किरण गायकवाड यांनी उपस्थित केला असता वरिष्ठांचे मार्गदर्शन घेऊन याबाबत कारवाई करू असे सांगण्यात आले. तर गिरणानगरचे सुनील सोनवणे यांनी अनेक शेतकरी हिताचे व मार्केट हिताचे प्रश्न उपस्थित केले त्याची नोंद घेण्यात येऊन पूर्तता करण्याचे आश्वासन देण्यात आले व्यापारी वर्गाचे परवाने देताना करण्यात येणारा दुजा भाव व काही व्यापाऱ्यांना नियमबाह्य झुकते माप देत असल्याबाबतची बाब न्यायडोंगरी येथील जगन पाटील यांनी पुराव्यासहित समोर आणली असता यावर मात्र सगळ्यांचीच बोलती बंद झाली. नांदगाव शहर व परिसरातील व्यापारी बांधवांकडून ५ लाख रूपये फिक्स डिपॉझीट तसेच घर किंवा शेतीवर नोंदणी कृत बाजार समितीचा बोजा नोंदवून घेतला जातो. तर दुसऱ्या तालुक्यातील व्यापारी बांधवांकडून फक्त १ लाख रूपयांची फिक्स डिपॉझीट घेतले जाते. असे परवाना धारकांच्या नावानीषी जगन पाटील यांनी दाखवून दिले तसेच सदरचा व्यापारी सुमारे २० ते २५ दिवसापासून बाजार समितीत येत नाही. त्याचेवर बाजार समितीची २ लाख ६५ हजार बाजार फी बाकी आहे. त्याचे काय असा प्रश्न जगन पाटील यांनी विचारला असता त्यास नोटीस दिलेली आहे.
असे सचिव अमोल खैरणार यांनी सांगितले सदरची बाजार फी ची रक्कम ही त्या परवाना धारकास जामीनदार असलेल्या व्यक्ती कडून वसूल करावी अशी सुचना जगन पाटील यांनी मांडली. तसेच न्यायडोंगरी बाजार आवाराच्या मोजनी बाबत झालेला घोळ पुराव्यासहित सभागृहापुढे मांडण्यात आल्याने सर्वच आवक झाले .कृषी उत्पन्न बाजार समितीने पैसे भरून दुसऱ्याच खाजगी व्यक्तीची शेत जमीन मोजून घेतली असल्याची धक्कादायक बाब समोर आली. तसेच लेखापरीक्षण अहवालात घेण्यात आलेले आक्षेप अद्यापही पूर्ण करण्यात आलेले नाही. त्यात अपंगांसाठी राखीव असलेले तीन टक्के व्यापारी गाळे अपंगांनी मागणी करूनही उपलब्ध करून देण्यात आलेले नाही. यावर लवकरच कार्यवाही करण्यात येईल असे आश्वासन संचालक मंडळाने दिले . यावेळी न्यायडोंगरी बोलठाण व नांदगाव यार्डात वर्षभरात सर्वात जास्त शेतीमाल विक्रीस आणणाऱ्या शेतकऱ्यांचा सत्कार करण्यात आला.
तर सर्वात जास्त शेतीमाल खरेदी करणाऱ्या व्यापाऱ्यांचा ही सत्कार करण्यात आला. यामध्ये नांदगाव मुख्य बाजार आवारातील आनंद ट्रेडींग कंपनीचे आनंद चोरडीया केदारनाथ ट्रेडींग कंपनीचे दिपक कासलीवाल विठ्ठल ट्रेडींग कंपनीचे ज्ञानेश्वर वाघ यांचा सन्मान चिन्ह देवून सत्कार करण्यात आला. यावेळी जगन पाटील यांनी सूचना केली की संपूर्ण वर्षात एकही रुपयाचा शेती माल खरेदी न करणाऱ्या व फक्त मतदानासाठी परवाना काढणाऱ्या व्यापाऱ्यांचा ही सत्कार आयोजित करावा त्या सत्काराचा येणारा खर्च मी स्वतः करण्यास तयार आहे. अशा अनेक प्रश्न उत्तराने सभा चांगलीच गाजली यावेळी न्यायडोंगरी चे जगन पाटील पोखरी चे गायकवाड साहेब गिरणा नगरचे सुनील सोनवणे चांदोरा येथील निलेश चव्हाण मूळडोंगरी चे बबनराव मोरे पिंपरखेड चे देशमुख सर न्यायडोंगरी चे विजय दगाजी आहेर आदी शेतकऱ्यांनी प्रश्न उपस्थित करून प्रशासनास व संचालक मंडळास चांगलेच धारेवर धरले होते.
शेवटी अध्यक्ष सभापती दर्शन आहेर यांनी सर्वांचे आभार मानून केलेल्या सूचनांचा आदर करीत लवकरच सर्व समस्या सोडविण्यात येतील असे आश्वासन उपस्थित शेतकरी व व्यापारी वर्गास दिले. यावेळी उपसभापती अनिल सोनवणे संचालक तेज दादा कवडे, सतीष बोरसे, एकनाथ सदगीर, पोपटभाऊ सानप,समाधान पाटील, बाळासाहेब कवडे,भाऊसाहेब काकळीज,कान्हा कलंत्री, निलेश इपर,अनील वाघ, जीवन गरूड यांचेसह शेतकरी व्यापारी मोठया संख्येने उपस्थित होते .
0 Comments