राज्यात आजपासून देवेंद्र पर्वास सुरुवात

 Bay -team aavaj marathi 

आज गुरुवार दिनांक ५ डिसेंबर रोजी सायंकाळी ६ वाजता मुंबईत आझाद मैदानावर पंतप्रधान नरेंद्र मोदी यांच्या प्रमुख उपस्थितीत महायुती सरकारचा भव्य दिव्य शपथविधी सोहळा पार पडला,आणि राज्यात देवेंद्र पर्वास सुरुवात झाली.

सविस्तर वृत्त असे की,आज सायंकाळी सहा वाजता राज्याचे एकवीसावे मुख्यमंत्री म्हणून देवेंद्र फडणवीस (devendra fadanvis) यांनी तिसऱ्यांदा शपथ घेतली. त्यांच्या पाठोपाठ एकनाथ शिंदे (eknath shinde) यांनी हिंदूहृदयसम्राट बाळासाहेब ठाकरे आणि धर्मवीर आनंद दिघे यांना स्मरून उपमुख्यमंत्रीपदाची शपथ घेतली. तर, विक्रम रचत अजित पवार (ajit pawar) यांनीही यावेळी सहाव्यांदा उपमुख्यमंत्रीपदाची शपथ घेतली. या भव्य दिव्य शपथविधी सोहळ्यासाठी अनेक उद्योजक, राजकीय, मनोरंजन, क्रीडा क्षेत्रातील मान्यवर उपस्थित होते.

याप्रसंगी देशाचे पंतप्रधान नरेंद्र मोदी, केंद्रीय गृहमंत्री अमित शाह, केंद्रीय मंत्री नितीन गडकरी, रामदास आठवले, राजनाथ सिंह, जे. पी. नड्डा यांच्यासह भाजप आणि मित्रपक्षांचे वरिष्ठ नेते उपस्थित होते. तसेच भाजपशासित राज्याचे २२ मुख्यमंत्री आणि तीन ही राजकीय पक्षाचे व इतर मित्र पक्षाचे आमदार त्याचप्रमाणे उद्योजक, क्रिडा आणि क्षेत्रातील मान्यवर मोठ्या संख्येने या सोहळ्याला उपस्थित होते. 

 यानंतर ११ तारखेला खातेनिहाय मंत्रिमंडळातील इतर मंत्र्यांचा शपथविधी होणार असल्याची माहिती मिळाली आहे. त्यामुळे आता कोणत्या पक्षाला किती आणि कोणकोणती मंत्रीपदं मिळणार..? याबाबतही उत्सुकता आहे. तर आता मुख्यमंत्रिपदाची शपथ घेतल्यानंतर देवेंद्र फडणवीस हे लगेचच पदभार स्वीकारतील आणि यानंतर तिन्ही नेत्यांनी संयुक्त पत्रकार परिषद बोलावली आहे. दरम्यान राज्यभरात भाजप आणि महायुतीच्या कार्यकर्त्यांनी ढोल ताशांच्या गजरात गुलालाची उधळण करत जल्लोष साजरा करुन आनंद व्यक्त करत आहेत.