नांदगाव तालुक्यातील मांडवड येथे क्रीडा व युवक संचालनालय महाराष्ट्र राज्य पुणे, तालुका क्रीडा अधिकारी कार्यालय नांदगाव, व स्व. शरद अण्णा आहेर जनता विद्यालय, मांडवड यांच्या संयुक्त विद्यमाने नांदगाव तालुकास्तरीय मुलींच्या शालेय कबड्डी स्पर्धेचे उद्घाटन मराठा विद्या प्रसारक समाज, नांदगाव तालुका संचालक इंजि.अमित बोरसे-पाटील यांच्या हस्ते संपन्न झाला.
यावेळी शिक्षण विभाग नांदगाव शिक्षण विस्तार अधिकारी नाईकवाडे, शालेय स्कूल कमिटी अध्यक्ष प्रशांत आहेर,मनमाड कृषी उत्पन्न बाजार समितीचे संचालक विठ्ठल आहेर, आदर्श प्राथमिक शाळा नांदगाव चे मुख्याध्यापक अविनाश साळुंखे, डॉ.प्रवीण निकम, अशोक निकम, अजित आहेर, पत्रकार सिताराम पिंगळे, जामदरी शाळेचे मुख्याध्यापक अहिरे सी.डी. न्यू इंग्लिश स्कूल नांदगाव चे उपमुख्याध्यापक चव्हाण,संजय त्रिभुवन, विद्यालयाचे मुख्याध्यापक थेटे एस. जी. पर्यवेक्षक महाले सर व्यासपीठावर उपस्थित होते.
कार्यक्रमाची सुरुवात प्रतिमा पूजनाने करण्यात आली. कार्यक्रमाचे प्रास्ताविक विद्यालयाचे मुख्याध्यापक थेटे यांनी केले, आपल्या प्रास्ताविकातून त्यांनी विद्यार्थ्यांच्या सर्वांगीण विकासासाठी खेळाचे महत्व विशद केले. म.वि.प्र. नांदगाव तालुका संचालक इंजि.अमित बोरसे -पाटील यांनी भारतीय आंतरराष्ट्रीय महिला खेळाडू मेरी कोम, सानिया मिर्झा, सानिका नेहवाल, पी. व्ही. सिंधू, साक्षी मलिक या खेळाडूंचे दाखले देत मुलींनी आंतरराष्ट्रीय स्तरावर तालुक्याचे नाव उंचावण्यासाठी प्रयत्न करावे असे आव्हान केले.
त्यासाठी तालुक्यातील कोणत्याही शाळेचा विद्यार्थी असेल त्यासाठी संस्था पुढाकार घेऊन विद्यार्थ्यांना सर्वतोपरी मदत करण्याचे आश्वासन दिले. शिक्षण विस्तार अधिकारी नांदगावचे नाईकवाडे यांनी खेळामध्ये यशस्वी होण्यासाठी सराव खूप महत्त्वाचा असतो जो नियमितपणे सराव करतो तो निश्चित यशस्वी होतो असे अधोरेखित केले. सदर स्पर्धेसाठी १४ व १७ वर्षाच्या आतील मुलींच्या ३० संघांनी सहभाग नोंदवला.
कार्यक्रमाचे सूत्रसंचालन क्रीडा शिक्षक संदीप आहेर यांनी केले आभार हेमंत परदेशी यांनी मानले. कार्यक्रम यशस्वी करण्यासाठी सर्व शिक्षक, शिक्षकेतर कर्मचारी यांनी परिश्रम घेतले.
0 Comments