नांदगाव तालुक्यातील जातेगाव येथील जलजिवन मिशन अंतर्गत मंजूर झालेल्या पाणी पुरवठा योजनेचे काम मागील काही महिन्यांपासून निधी अभावी ठप्प झाले आहे.
याबाबत सविस्तर वृत्त असे की, तालुक्यातील लोकसंख्येने तिसऱ्या क्रमांकाचे व घाटावरील मोठे असलेल्या जातेगाव १९७० च्या दशकात तत्कालीन आ.लोकनेते कै.कन्हैयालाल नहार यांच्या प्रयत्नातून झालेल्या सार्वजनिक पाणीपुरवठा योजना राबविण्यात आली होती. सदरची योजना वाढत्या लोकसंख्येमुळे कमी पडत असल्याने वारंवार मागणी केल्यानंतर सन २०२२ मध्ये केंद्र आणि राज्य सरकारच्या वतीने राबविण्यात येणाऱ्या जलजिवन मिशन अंतर्गत जातेगाव साठी १ कोटी ४१ लाख रुपयांची नविन पाणी पुरवठा योजना मंजूर करण्यात आली.
या योजनेअंतर्गत एक स्वतंत्र १५ मिटर खोल व ६ मीटर रुंद विहिरीचे खोदकाम येथील पाझर तलावात करण्यात आले. व तेथून मुख्य पाईप लाईन टाकून येथील छत्रपती शिवाजी महाराज चौकाच्या मागच्या बाजूला १ लाख ८० हजार लिटरच्या पाण्याच्या टाकीचे बांधकाम करण्यात आले. तेथून गाव अंतर्गत ७० % पाईप लाईन टाकण्यात आल्या. परंतु गेल्या काही महिन्यांपासून नवीन बांधकाम करण्यात आलेल्या टाकीचे वॉटरप्रूफ प्लास्टर, त्याचप्रमाणे टाकीमध्ये पाणी टाकण्याची मुख्य पाईप लाईन जोडणे, तसेच गाव अंतर्गत पाणी वितरणासाठी पाईप लाईन जोडणे, टाकी वर चढण्यासाठी शिडी लावणे त्याचप्रमाणे टाकीच्या वर संरक्षण ग्रील फिट करणे, रंगरंगोटी करणे इत्यादी कामे या योजनेची संपल्यानंतर सुध्दा अपूर्ण आहे.शासनाच्या या गलथान कारभाराची झळ नागरिकांना बसत असून २०० लिटर पाणी साठ रुपये दराने विकत घ्यावे लागत आहे.
याबाबत पाणी पुरवठा योजनेचे ठेकेदार येवला येथील नवनाथ खोडके यांचेकडे चौकशी केली असता त्यांनी वरील प्रमाणे माहिती दिली.व आतापर्यंत सरासरी ८०% काम पूर्ण झालेले आहे. आमची शासनाकडून ३०% रक्कम बाकी आहे. माझे सारखे जिल्ह्यातील सर्व ठेकेदार शासनाच्या धोरणाने हैराण झाले आहेत. पंधरा दिवसांपूर्वी जिल्हा अधिकारी कार्यालय व पाणी पुरवठा विभागाचे कार्यालयासमोर निदर्शने केले होते. परंतु अद्याप कुठल्याही प्रकारचा मार्ग निघाला दिसत नाही.त्यामुळे कामासाठी पैसे नसल्याने मुदत संपल्यानंतर ही काम पूर्ण झाले नाही. तरी पाणी पुरवठा योजनांच्या कार्यालयाकडे अर्ज करुन २०२६ पर्यंत उर्वरित काम पूर्ण करण्यासाठी मुदतवाढ घेण्यात आली आहे. तसेच कामासाठी पैशाची तरतूद होताच, थोड्याच दिवसांत वरील काम पूर्ण करोत असे ठेकेदार खोडके यांनी सांगितले.
0 Comments